“Cidade Velha” d’Bubista: guia ofisial ta apela auturidade un atensãu seria pa lugar

É na lukalidade d’Kurral Bedje é ke kontsê génize d’ilha d’Bubista, sima kontá turismoSAB.cv, Claudio Pretelli – guia ofisial.

Claudio Pretelli, dzê ke mute triste oiá un lugar stóriku moda Kurral Bedje konpletamente bondonôde e el ta falá na nome d’ses kolega guia ke tanbê ta otxa ke é presise tmôde algun midida pa valorizá-l.

“Pa ken ka tá konxê Kurral Bedje, li é ke berse d’kabrerers. Kes primer jente ke forma pupulasãu d’ Bububista nasê li na ese zona. El tá levá jente pa 400 one atraz. Bubista foi kes primer ilha ta ser povôde du nada…”, ta rekordá Protelli ta mostra valor ke ese lugar ten.

Stória, forma d’sustente e future d’ilha foi desenhôde na Kurral Bedje e, oje, sima el ta dzê, kome ponte d’pasagen turistika, ese lugar ta mestê un “medjor tratamente”.

“Se nô repará el ta parse un lugar bondonôde, Ka tá sinalizôde, ken ta pasá preli ka ten nen informasãu d’un lugar spetakular é tá defini prinsipiu d’izistesia d’ese pupulasãu…”, reforsa k’tristeza.

Ta reforsa k’tristeza Cláudio Pretelli, ta apela auturidade un atensãu s´eria pa Kurral Bedje é ti ta meste ser delimitod, plaka d’informasãu stórika e turistika, e sobretude, d’un stúdiu stóriku pa konta verdadera stória d’lugar e d’Bubista.

Se bo tiver mas stória interesante d’Kurral Bedje, konta nôs tanbén…