- Advertisement -
Advogóde Marcello Colella ta pedi inkontre urjente k’Guverne, The Resort Group, representante d’invistidor, furnêsedor i trabaiador pa inkontrá un solusão rapte, d’forma a ivitá un prusese judisial, ke podê ben levá a un solusãu prolongóde.
Na seguimente d’inkérite ke turismoSAB.cv fazê (link) sobre un grupe d’trabaiadores é ta priokupóde ke ses situasãu na The Resort Group, ja ke ese inpreza ten pasode pa uns mumente difisil, por konta d’pandemia COVID-19 I es ka ten renovóde kontrote, nen pagóde totalidade d’lay off pa txeu d’ses trabaiador, advogáde Marcelo Colella, é ta prestá servise d’advogasia, asesuria I konsulturia na Kabeverde já ten más d’10 one, I ta representá alguns d’kes investidor má furnesedor na Sal I Boa Vista, prokurá nôs I el dzê ke el ta dispunivel pa ajudá tude kes trabaiador é ka ten kondisãu pa paga un advogade. Segunde Marcello Colella dzê, ese é un asunto susial txeu sensivel I é ke presizá ter un junta mon pa resolvel, já ke vida de txeu jente ta korrê riske. Pur ise, el ta pidi Guverne pá sentá má TRG I reprizentante d’tude invulvide (investidor, fornesedor I trabaiador) pa inkontrá un sulusãu rapte, d’forma a ivitá un prusese judisial, é ke podê ben ten un perkurse mute prolongóde”, el reforsá.
“Dôs kosa: grinhasin N ta representá nhas kliente investidor I furnesedor, I se otxes kiser juntá ma nôs, porta ta aberte, porke, ideia é torná un grupe más grande posível, pas pôde ten voj frente d’Guverne d’Kabeverde I junte ma TRG.
Ote koza é ke nô ta falá d’un problema susial, ondê ke jente é ta ke prublema d’nher ka ta pôde pagá un d’feza kalifikóde”. Manera ke Nô podê ajudá é ta ôferese nôs sirvise I mi psualmente, Nta fazê pro bono (ajudá ken ka ta pôde pagá). Pro Bono ta fazê parte d’nha estória prufisiunal I porke mi é tanbê un peixônode pa bezote país, entãu se Nta pôde ajudá li, ese é un manera d’fazêl. Nta otxa ke psoas ta meresê, jente ka podê pedi d’nher na ken ka ta na kondisãu d’pagá. É ise “Nô kre orientas, dás kunsulturia pas pôde sabê mánera ke es ta d’fendê ses direite“, konfirmá Colella pa TS.
Marcello Colella, konfirmá TS ke el ta representá alguns d’kes investidor I tanbê, furnêsedor, na Sal I Boa Vista. Se ubjetive maior, é reuni más furnesedor pusível, pa junte inkontrá un solusãu “urjente” I “saudável”, pa ben tude ken ta involvide na ese situasãu I, subretude pa imagen d’país.
“Nô ta falá d’un grupe txeu grande, inportante I ta respresentá un d’kes medjor marka d’munde (Meliã). Un grupe é k’ten un grande inportansia na istória kontenporania d’turisme na Kabverde. Ten serka 1500 funionárie, logikamente familia é ta depedne d’eses salárie. (…) Un grupe inportante, ninguén pôde dzê kontrárie. Es investi txeu denher na Kabeverde. Agora, el ta pasá pa difikuldade, talvej pôde ser konsekuensia d’pandmia o un difikuldade é ta ben antes d’COVID. Mas, un kosa é klore, é presise kunfia na seriedade d’ese grupe I espiá pusibilidade d’inkontrá un solusãu. Ten un prublema grande é ta involvê investidores i trabaiadores é ta dependê de Resourt Group I, lojikamente na imagen d’país é ta en kausa”, el sublinná.
Comentários estão fechados.