The Resort Group, inpreza gistora d’sinke resort na ilha d’Sal (Meliã Tortuga Beach, Meliã Dunas, Sol Dunas, Llana Beach Hotel i Tui Sensimar), na ultimes tenpe, ten pasóde pa un situasãu difisil, prova dise é es ta prôpo ka renova más kontrote ma alguns trabaiador I es ta renomerá otxes.

TurismoSAb.cv subê k agora na mes fevrer, kes trabaiador é terminá kontróte es ka renovas ses kontróte, I daki un tenpe pôde ben te mas.

Móda nô sôbe, já somá serka d’600 psoas ke foi dispensóde disde marse 2020, ke inisie d’pandemia, na kes 3 resort (Llana, Tortuga e Dunas). É, ke txeu d’kes trabaiador é ke tinha kontróte ifêtive, tanbê foi dispensóde, k´un pruposta d’indmizasãu na valor d’30% d’ses salárie, pa ser pagóde na 3 prestasãu.

“Txeu des siná proposta pa ses vontade, ma otxes es presionas pa siná. Prublema é k txeu ka ta konxê ses direite drete, enton, es ta txa levá pa presãu I, agora es ta rependide, purke impreza ti ta usá pandemia kome deskulpa pa ubriga siná, alén d’ promete k es pôde voltá dente 5/6 mex, se TRG abri pórta”, dzabafá un trabaiador na anonimate.

TS kontata TRG I, es ta spliká ke, es ka ten dispide trabalhadores, I, es dzê k:

“Ta existi é, denunsia d’kontróte d’trabói a terme serte I akôrde d’revogasãu d’kontróte ke algun trabaiador. I es ta resebê ses kompensasãu I indemnizasãu móda lei ta mandá”, Es ta reforsá inda, k: “d’mes d’marse atê setembre d’2020, TRG fazê pagamente 100% d’148 trabaiador, k’esperansa, ke turisme tava voltá na fin d’one I, tava ajudá nôs rekuperá”, esin es eskreve na resposta.

Segunde kumunikasãu susial, na mes d’nuvenbre, TRG komesá ta pagá kes trabaiador é k’tava na lay-off 11 mil eskude, na lugar d’kel 35% é ke foi kolokóde na lei. Pamode ise, IGT (Inspeção Geral de Trabalho) mandá TRG respeita lei, I pa pagá kes trabaiador ses direite, “ma ka tive susese”.

Sobre ese asunte, TRG, ta spliká ke, es ten feite pagamente d’lay-off d’Ebril atê Oitubre, purke, disde d’mes d’marse é ke es ka ten reseita, pur kause:

“d’falta d’pagamente d’operador turistike, pur ka ten side provóde inpréstime na kes linha d’krédite d’COVID-19, I einda ke dividas d’CV Airlines, I prôpe d’Guverne (d’jogue Africano d’praia na 2019). Mesme esin, moda es dzês, “es ten tentóde guentá ses trabaiador”.

“Nô ten ke dzê, ke TRG, optá na inisie d’pandmia pa ka fazê d’despidi kuletive, pa pôde fka k’más poste d’trabói posível. Ese situasãu, imbora el ta paralizá nôs ikunomia, el é más kurrete I juste, pa risponsablidade susial I pa inportansa ke nôs trabaiador ten pa kresimente d’impreza”, asin, justifika TRG, atravês d’se advogade na resposta a nôs pergunta, Tiago Costa.

TS falá ma algun d’kes trabaiador pa sabê manéra é ke es ti ta vivê grinhasin, enton, es konfesá k situasãu já tma un kamin “insustentavel” I, móda es t’afirmá se ka for tmôde midida urgente podê ben ser um katastrefe pa Sal I pa País.

Es ta dzê einda ke, es ka ta intênde k’mánera ke, un impreza ke é txeu rentavel móda TRG, d’repente ta txa d’pagá trabaiador ses salárie, nen k’100%, ke ses direite, nen 35%, móda é ta na lay-off (3º lay-off).

Té terminá ese reportágen, TS ka tive resposta de INPS (Instituto Nacional de Previdência Social) , DGT (Direcção-Geral do Trabalho) na Sal inkaminha asunte pa diresãu geral na Praia, é ten responsabilidade na asunte. Inkuante Sicotur (Sindicato da Indústria, Comércio e Turismo), tude kontate feite foi sen resposta.

Disposte pa lutá i ten ses vida d’volta, es dzê ke, es ti ta sinti kompletemente bondonóde, entãu, es ta perguntá pa ken d’direite:

• purk nada ka ti ta ser feite?
• kuase mil trabaiador é ti ta kontribui pa kofre d’Estade, ka ta interesá pa governante?
• purk impreza ka ti ta ser ôbrigóde rispetá lei?
• ondê Guverne na ese mumente, se antes d’pandemia foi dite ke dstine d’país tava na mon d’ilha d’Sal?
• Partir d’mex d’marse, u ke, ta ba ser fete, se impreza entrá na falénsa?
• Kal ke plône é ten pa ese kuase 2 mil psoas é ta trabáia lá? I, subretude, Ken ta asumi nôs risponsabildade i inda pagá advogade?”

Krê sabê mas konpanha vidie …