Jovens ti ta inplamenta negosiu kumintarie pa diversifika oferta turistika i dzenvolve komunidades

Prujete e un forma d’ligá kumnidade i turista já tá pensa na dzenvolvimente susial, ambiental i sustentabilidade d’kes mesme kumnidade, ondê kes ten un suporte pa inpudera pesoas atravex d’ses oferta lukal.

Negôse susial ke foke na konetá kumnidade i turistas e aposta d’dox joven, António Barbosa Monteiro d’ilha d’Santiago i Divânia Fortes d’ilha d’Sal, ke depôs d’partisipá na Prujete Internasiunal “LampHope” es desidi inplementa ideia na Kabe Verde pa ingana krise i isdá kumnidade na diversifikasãu d’ ofertas turistikas na paíx.

Na konversa ke TurismoSab.cv teve ma ex jovens, no fka pa sabê ke, prujte e un forma d’ligá kumnidade i turista já tá pensa na dzenvolvimente susial, ambiental i sustentabilidade d’kes mesme kumnidade, ondê kes ten un suporte pa inpudera pesoas atravex d’ses oferta lukal.

“Lamphope sê ubijetivu e inpudera kumunidadi, atravex d’potensialidadi turistika ke kada un podi uferesi. Un izenplu konkretu e ke na ilha di Santiago nu tá trabadja ku varius kumunidadis, Ribeira Grandi, Sãu Martinhu, Pico Liãu i otxus. Nu sabi ma kada un di kes kumunidadi ten putensialidadis turistiku pa da risposta a novus tendensias, sima turismu kumunitariu, ligadu a turismu di natureza, psoas la fora kre konxi kel lôkal …”, reforsa António Monteiro.

Já Divânia Fortes ti ta oia na esse ideia, un grande oportunidade pa diversifika u ke ilha d’Sal já tá oferese, ke sol i praia, por ise ke na kinta-fera, prujete tá bem ser apresentode na ilha, pal pôde dá ses primer aranke.

“Na peskisa ke no ten fete, no ten konstatôde ke turista tá espia senpre lugar é tá da-l trankuilidade. Sal e un ilha trankil, enton dente d’ese trankuilidade nôs tá pôde traze otxes ofertas. Atravex d’un postura menus infurmal pusivel txega na psoas i ajudas a inplamenta ses negõsie o ideia d’negósie, senpe na intensãu d’ajudas a ser mas autonome posivel. Enton, no ten kontatôde ma guias, kes donas d’kasa pa oferese ses dosin sabe, kel é tá planta se batata doce pa un kmidinha d’terra…ke pode ser un upurtunidade pa un turisme gastronõmike li. (…) e presise mostra pesoas ke es tá inkluide na ese prusése i mostra-l ke el ten apoie pa-l produzi”, reforsa Divânia, lenbronde ke kada kumnidade e un potensial ponte turiske i ke se oferta e u kel ten d’mas jenuine i lukal.

Prujete i ptalaforma tá ben ser lansôde kinta-fera na ilha d’Sal i pimer kumnidade e tá resebe-l é Rbera Funda. Plataforma “LampHope.com” e un prujete d’negósie susial pa koneta kumnidade ke turistas ke proposte tá pensa na dzenvolvimente susial, ambiental i sustentavel d’kes kumnidade, ondê ke 25% d’kada xperiensia e diresionôde pa ajuda-s.